Plantun de Prouvènço

Pèr coumpara dos planto d'encò nostre

Galium debile & Scleranthus annuus

Galium debile

Rubiaceae

Nom en français : Gaillet chétif.

Descripcioun :
Aquesto reboulo trachis dins la palunaio e àutri relarg bagna (mueio, roubino...). Es uno planto pulèu grando e di proun ramificado. Se destrìo dis àutri reboulo qu'a ges de benc à la pouncho de si fueio. Li flour de 1,5 à 4 mm, noumbrouso, fan de gràndi paumo (paniculo). Apartenié, i'a gaire de tèms, à l'espèci palustre emé tres àutri meno. Coumpara emé la reboulo-aloungado que ié sèmblo proun. Pamens aquesto radiero a de fueio mai largo e li pecou di fru que parton sus li cousta.

Usanço :
Couneissèn pas d'usanço particuliero pèr aquelo planto. Escriéure au site se n'en sabès mai.

Port : Erbo
Taio : 15 à 120 cm
Fueio : verticilado
Tipe bioulougico : Emicriptoufite
Cicle bioulougico : Planto renadivo

Gènre : Galium
Famiho : Rubiaceae

Ordre : Gentianales

Coulour de la flour : Blanco
Petalo : 4
Ø (o loungour) flour : 1,5 à 4 mm
Flourido : Printèms - Estiéu

Sòu : Ca
Autour basso e auto : Pancaro entresigna
Aparado : Noun
Mai à juliet

Liò : Palun - Prado umido - Mueio
Estànci : Termoumediterran à Mountagnard
Couroulougi : Mediterranenco-Atlantico
Ref. sc. : Galium debile Desv., 1818 (= Galium palustre subsp. debile (Desv.) Berher, 1887 )

Gnavello(-de-l'an)

Scleranthus annuus

Caryophyllaceae

Nom en français : Gnavelle annuelle.

Descripcioun :
Aquelo planto, proun ramificado, se tirasso sus la sablo e lis endré trepeja. Sus si tijo se podon vèire uno à dos bando de péu crespu. Li fueio soun redo e en long. Li flour, verdo, soun pas bèn grosso e fan d'enflourejado agroumelado. La subsp. presentado eici, emé de flour gaire duberto e que trachis dins li mitan primàri, ié dison polycarpos. Coumpara emé la gnavello-renadivo.

Usanço :
Fai partido dóu group (38 meno) de flour dicho "de Bach". Ramenten que lou mege, Dr Edward Bach (1886-1936), adoubè de poutingo de flour que dèvon "armounisa l'equilibre epsichique de la persouno". La gnavello permetrié de prendre de decisioun. En Poulougno, au siècle passa s'acampavo li babo de vermèu (Coccus Polonicus) que reston sus li racino pèr n'en faire un coulourant rouge.